KU ËSHTË TRUPI DIPLOMATIK? KU JANË INSTITUCIONET?
Në prag të protestës së 4 Korrikut, qindra shqiptarë të diasporës po raportojnë pengesa serioze në hyrje të Shqipërisë. Pretendimet që po qarkullojnë janë të rënda dhe nuk mund të kalohen në heshtje.
Nëse këto denoncime nuk janë të vërteta, institucionet kanë detyrimin t’i sqarojnë me transparencë. Por nëse janë të vërteta, atëherë kemi të bëjmë me një turp për një shtet që pretendon të ecë drejt Bashkimit Europian.
Pyetja jonë është e drejtpërdrejtë:
Ku është trupi diplomatik i akredituar në Shqipëri? Ku janë ambasadat? Ku janë institucionet ndërkombëtare që për më shumë se 35 vjet na kanë mësuar se demokracia mbrohet me protesta paqësore, me lirinë e shprehjes dhe me respektimin e të drejtave të qytetarëve?
Nëse sot ekzistojnë dyshime serioze se qytetarët po përballen me pengesa në prag të një proteste demokratike, heshtja nuk mjafton.
Shkoni në pikat kufitare. Verifikoni vetë situatën. Flisni me qytetarët. Dëgjoni dëshmitë e tyre. Kontrolloni faktet në terren. Ky është roli i institucioneve që mbrojnë demokracinë dhe të drejtat e njeriut.
Një thirrje edhe për opozitën
Z. Sali Berisha, z. Agron Shehaj dhe çdo deputet i opozitës që çdo ditë u thotë qytetarëve: “Jemi me ju.”
Nëse jeni vërtet me qytetarët, mos prisni deklarata nga zyrat. Shkoni në kufi. Verifikoni vetë çfarë po ndodh. Takoni shqiptarët e diasporës. Dëgjoni zërin e tyre dhe kërkoni transparencë nga institucionet.
Nëse këto denoncime rezultojnë të pavërteta, le ta dijë i gjithë opinioni publik.
Por nëse rezultojnë të vërteta, atëherë është detyra juaj morale dhe politike të ngrini zërin dhe të kërkoni që asnjë shqiptar të mos pengohet të hyjë në vendin e vet dhe të ushtrojë të drejtën kushtetuese për të protestuar në mënyrë paqësore.
Fjalët “Jemi me ju” kanë vlerë vetëm kur shoqërohen me veprime. Sot është dita për ta provuar.
Demokracia nuk mbrohet me heshtje. Demokracia mbrohet me praninë në terren, me transparencë dhe me guximin për të mbrojtur qytetarët. Nëse Shqipëria synon Europën, standardet europiane duhet të zbatohen në praktikë, jo vetëm në fjalime.
Redaksia e Diaspora Torinese