nga Gjergj Yllneshaj
LETËR E HAPUR DREJTUAR ANËTARËVE TË PARLAMENTIT EVROPIAN
Të nderuar anëtarë të Parlamentit Evropian,
Quhem Gjergj Yllneshaj. Jam nji shkrimtar shqiptar qe prej tridhjetë vitesh jetoj, në zemër të Evropës. Dhe kjo eshte ajo qe edhe e me mire kuptimin e demokracisë dhe të përgjegjësisë politike.
Kam një pyetje të thjeshtë për ju: A është kjo Shqipëria që dëshironi të mirëprisni në Bashkimin Evropian?
Një vend ku kryeministri Edi Rama është në pushtet prej rreth katërmbëdhjetë vitesh, ku akuzat për korrupsion kanë tronditur vazhdimisht qeverinë, ku shumë zyrtarë të lartë përballen me hetime ose procedime penale dhe ku kryeministri nuk mban asnjë përgjegjësi për atë që ndodh nën drejtimin e tij.
Kur gjysma e qeverisë përfundon në burg dhe zyrtarët e tjerë përballen me akuza apo çështje të lidhura me SPAK-un, Prokurorinë e Posaçme kundër Korrupsionit dhe Krimit të Organizuar, çfarë duhet të bëjë një kryeministër kur pretendon se njerëzit përreth tij kanë vjedhur pas shpinës së tij?
Jep dorëheqjen!
Mjaft u fshehe pas justifikimeve. Mjaft u shtire sikur nuk di asgjë. Mjaft e drejtove një vend sikur përgjegjësia politike të mos ekzistonte.
Edi Rama, mjaft më! Ne nuk të besojmë më. Nuk mund të të besojmë më për të drejtuar këtë vend. Nëse nuk je në gjendje të kontrollosh qeverinë që ke ndërtuar vetë, atëherë largohu.
Gjithçka ka marrë fund. Nuk të duam më në krye të vendit tonë!
Por ajo që po ndodh me studentët dhe protestuesit është edhe më serioze. Dhuna ndaj tyre është e papranueshme dhe e turpshme.
Prej muajsh, qytetarët kanë dalë në rrugë për të protestuar në mënyrë paqësore. Dhe çfarë shohim? Policë që qëllojnë me plumba gome, godasin me shkopinj gome dhe rrahin të rinj e studentë, edhe kur ata nuk bëjnë rezistencë. Janë pamje që duhet t’i thyejnë zemrën çdo prindi dhe të turpërojnë çdo qeveri dhe cdo kryeminister.
Këta janë fëmijët tanë, jo armiq të shtetit!
Policia nuk është qeveria. Ajo është një instrument i pushtetit shtetëror. Përgjegjësia politike i takon atij që drejton qeverinë dhe mbikëqyr institucionet e saj. Kryeministri duhet të garantojë që pushteti shtetëror të mos përdoret kurrë për të sulmuar qytetarët që ushtrojnë të drejtat e tyre.
Kur kryeministri njofton një shpërblim prej 2.500 eurosh për punonjësit e policisë dhe më pas qytetarët përballen me një përshkallëzim edhe më të madh të dhunës, si të mos kërkojmë përgjegjësi politike?
Janë paratë e fituara me mund nga populli shqiptar ato që financojnë këto institucione. Paratë publike nuk duhet të kthehen kurrë në një mjet për të frikësuar fëmijët tanë.
Po ju në Bruksel, ku jeni?
Ku është Ursula von der Leyen? Ku janë të gjithë ata që na flasin për demokracinë, të drejtat e njeriut dhe shtetin e së drejtës?
Prej muajsh shqiptarët po protestojnë. Por, kur shohin nga Evropa për të marrë një përgjigje, përballen me heshtje dhe me deklarata që nuk ndryshojnë asgjë.
Kjo është e turpshme. Ajo dëmton besimin që shqiptarët kanë vendosur te Evropa.
Kur njerëzit humbasin besimin te drejtësia, shohin fëmijët e tyre duke u rrahur dhe ndiejnë se çdo rrugë paqësore është mbyllur, zemërimi mund të marrë përmasa të rrezikshme. Në një shoqëri ku shumë familje zotërojnë armë, askush nuk duhet të pretendojë se ky rrezik nuk ekziston.
Ne nuk duam që Shqipëria të zhytet në tragjedi. Pikërisht për këtë arsye po ju paralajmërojmë sot.
Mos prisni që situata të shpërthejë përpara se të flisni. Mos thoni nesër se nuk e dinit.
Ne nuk po ju kërkojmë të na shpëtoni. Po ju kërkojmë të mos bëheni bashkëfajtorë përmes heshtjes politike.
Nuk po ju kërkojmë të vendosni se kush duhet ta qeverisë Shqipërinë. Po ju themi se një kryeministër që ka humbur besimin e qytetarëve të tij dhe refuzon të marrë përgjegjësi për gjendjen e vendit duhet të largohet.
EVROPË, MOS E MBRO MË EDI RAMËN!
Kur Evropa nuk flet, nuk dëgjon dhe mbyll sytë përballë dhunës ndaj popullit shqiptar, çfarë duhet të mendojë ky popull?
Shqiptarët kanë filluar ta shohin heshtjen e Evropës si mbrojtje politike për Edi Ramën. Kjo e dëmton rëndë imazhin e një Evrope që pretendon se mbron demokracinë dhe të drejtat e njeriut.
Ursula von der Leyen, nëse nuk po e mbroni Edi Ramën, provojeni me veprime! Nëse nuk e mbështesni, atëherë mos heshtni më ndërsa policia ushtron dhunë ndaj qytetarëve dhe studentëve, përfshirë edhe të mitur 13, 14 dhe 15 vjeç!
Evropa nuk mund t’u kërkojë shqiptarëve të besojnë te vlerat evropiane, ndërkohë që heshtja e saj krijon përshtypjen se një kryeministër qëndron mbi përgjegjësinë politike.
Edi Rama, gjithçka ka marrë fund. Jep dorëheqjen! Dhe Evropa, mos hesht më në një mënyrë që e bën popullin shqiptar të besojë se po e mbron atë!
Të nderuar anëtarë të Parlamentit Evropian, ju duhet të vendosni nëse vlerat evropiane janë parime të vërteta apo thjesht fjalë të bukura që përdoren kur është politikisht e leverdishme, ose kur dielli shkëlqen mbi Evropë.
Zonja Ursula von der Leyen, populli shqiptar po ju paralajmëron sot. Ju do të mbani përgjegjësi për atë që do të zgjidhni të bëni përballë këtij paralajmërimi.
Do ta vlerësoja shumë nëse kjo letër do t’i përcillej Presidentes së Komisionit Evropian, Ursula von der Leyen, në mënyrë që ajo të dëgjojë drejtpërdrejt shqetësimet e një qytetari shqiptar , qe me padiskutim eshte edhe shqetesimi i miljona shqiptarve ne te gjithe boten, që ende besojne te vlerat e demokracisë, drejtësisë dhe dinjitetit njerëzor.